القهوه العربيه

بسم الله الرحمن الرحيم


موضوع سبق ان كتبته في فتره ماضيه اعيده بمناسبة افتتاح هذا القسم..

: :

يا ما حلا يا عبيد في وقت الاسحار

جر الفراش وشب ضو المناره

معدلة تجذا على صالي النار

ونجر الى حرك تزايد عياره

النجر طق وجاذب كل مرار

مالفه الملفوف من دون جاره

في ربعة ماهيب تحجب عن الجار

لامن ولد اللاش ما شب ناره






مساكم الله بالخيرات..
مساكم الله بكسرة عود تدخن فوق الجميرات..
مساكم الله بريحة السميرات<<<يعني السَمَر بس لزوم التسجيع..
مساكم الله بريحة الخزامى والنفل..
<<<خلاص يكفي ابداع ترى بيتحطم الشيخ عائض الله ينفع به..

مالكم بالطويله المهم منذ زمان ونفسي اوطوط في موضوع واكتب عن المطبخ بس ماش الوضع يخوف مالها داعي بكره تطلع صورتي في الديوانيه وانا طاق مريلة المطبخ..

المهم وبعيدا عن البربره والقرقره والهذرره اليوم مسكت ابي قهوة بر وقلت مالي الا حبايب قلبي شباب المعالي يشاركوني اياها(اما لو يجي الصاحي بعد )..

نجي للموضوع:

قدر الله علي وطحت بالمكاشيت وسفرات العزوبيه "وكمان لزوم دورات ماقبل الزواج في مطبخ البيت"..
(لعبو علي وقالوا اني سنافي)..
ومنها تعلمت فن صناعة القهوه..


وللاهميه القهوه العربيه فنننننننن وفن صعب بعد..

طبعا للقهوة المعده في البر مذاق خاص..والسبب على زعم الشياب انها على نار حطب..
وهي اللي بقول طريقتها..

في البدايه لازم نذكر انواع القهوه الجيده ومكونات القهوه:

*اجود انواع القهوه هو البريه والهرري والخولانيه..
ومتوفره بالسوق..
*الهيل والفاخر منه يبين بالريحه وحجم الحبه..طبعا الغالي سعره فيه..
*الزعفران..امممممم ما ادري بس اهل الامارات ماشاء الله عندهم زعفران قمة وهو افضل ما تذوقت سواء في القهوه او غيرها واعتقد انه ايراني..اللي يبي منه يامرني بس..
*يضاف في مرات القرنفل(المسمار) انا ما اشرب القهوه خلقه بس اذا جا معها هالشي كرهت ريحتها..
*البعض يضيف الزنجبيل مع القهوه(مع الهيل)..
*اخر حركه شفتها مع احد الشباب وهو يحط حليب ابو قوس قبل ما يزل القهوه في دلة التقديم"والسبب هو عشان تخفف الحموضه!!"..





ادوات التحضير في البر(الاغلب استغنى عنها الان ان لم يكن الكل)..
*المحماس: وفيها نحمس او نحمص البن..
*المبرادة : وهي اله او قطعه خشبيه فيها يتم تبريد البن بعد حمسه·
*النجر أو المهباش"عند اهل الشمال" : ويستخدم لطحن القهوة والهيل والقرنفل·
*دلة التفويح: تطبخ بها القهوة·
*دلة التبهير والتقديم: وفيها نبهر القهوه ونزلها قبل التقديم
*الليف:هو الذي يحجب الهيل من النزول في الفنجان عند تقديمه

: :

التحضير:
*اولا تحميص البن..
اكيد تحميصه في البر يكون على الحطب وهو سر تميز القهوه في المكاشيت..
واحسن شي انك تسوي قهوة كل دله في وقتها..

تحمص القهوه مع التحريك الى ان تصل الى درجه بني فاتح الى بني(يعني شقرا)..
ما يحتاج نقول ان سبب التحريك هو عشان ما يحترق بعض الحب والبعض الثاني يكون نص استوا والثالث ني (كبده مو قهوه)..

بعدين جب لك نجر وكمخ في القهوه الين تصير شبه ناعمه الى شبه خشنه(والله من زين الوصف)..
اذا كانت ناعمه بتتطاير في موية القهوه واذا خشنه بتعذبك في اعدادها..

<<<<لاعبين علي الشياب مخليني اكفخ بهالنجر الين دخت..

بعدين الهيل في النجر ودق لك كم حبه دق الله راس شارون..

المهم لازم يكون معك دلتين وحده للتفويح والثانيه تزل فيها القهوه..

حقت التفويح خل الماء فيها الى ان يغلي اذا غلى ارفعها عن النار وحط لك 3 فناجيل ونص قهوه وعلى حسب حجم الدله..
بس الافضل انك تقيسها (فنجال لكل لتر) تقريبا تزيد او تنقص شوي..
خلها على نار هاديه لين تدوخ من الطبخ<<<<خصوصا اول ما تبدا تتعلم تسوي القهوه(يعني مثلي)..
يعني بعد سبع دقايق من التقلب والدوخه..
خل القهوه تركد شوي عشان ما تزل الحب معها في دله




التقديم..
حط ملعقة صغيره من الهيل في قاع الدله وشوي زعفران<<نوع الزعفران يحدد الكميه اذا كان الزعفران درجه اولى ما يحتاج الا القليل..(الباديه واهل المحافظات والقرى في نجد يتعبرون كثرة الهيل من الكرم)
<<<<والله اشرب القهوه واسويها وما ادري هو فيها هيل او لا..
حط هذاك الشبك الصغير اللي كنه غربال بس حق الكوفي وزل القهوه في دلة التفويح..

جب الليف وحطه في (زقم) الدله..واذا كنت في البر ونسيته يا كسرة حطبه او ملعة مقلوبه..
وكذا تصير القهوه جاهزه..

تقديم القهوه عند الرجال:
<<<<انواع التعقد من هالشي..
اكيد التمر موجود بانواعه..
ومن اشهر انواعه السكري والخلاص..
يمتاز السكري بحلاوته ولكنه يسبب نوع من الحموضه "وش قصتي مع الحموضه اليوم؟!" لكبار السن لذلك يرغبون في تناول الخلاص بدلا عنه..

بعض الناس يحبون التمر مع القشطه او اللبنه او الطحينه..



بس شلون تصب القهوه؟؟

الكثير من قبائل وحمايل نجد(والسعوديه) يهتمون لهذا الامر اشد الاهتمام..
فمن المخجل والمعيب ان يقدم القهوه شخص غريب(يعني هندي اوقهوجي ومرات احد خارج افراد البيت) (بس الناس سمحين الان)..
اضافة الى ان الدله يجب ان تكون ثابته في اليد وما يطلع منها اصوات..

يعني اكيد الدله باليد اليسار والفناجيل باليمين(ماشاء الله)..والدله ما تهتز باليد..
الفنجال اذا جيت تصب القهوه لا تملاااااااااااه والا ترى الفنجال بيتمرقص على جبهتك..
لانه باعتقادهم اذا مليت الفنجال فهي طرده(ازنط الصاحي واعرف من الشويب اللي مطلع هالكلام )..
يعني خل القهوه في قاعة الفنجال والاهم وانت تصب لا تطق الدله بالفنجال ولا تطلع صوت(كسروا راسي الشيبان)..
ولاتنس وانا اخوك وانت تصب لاتصير ساكت بس..
لا قم هل قل وانت تصب ياهلا ويامرحبا تو مانور المكان اسفرت وانورت يالله حيه هذي الساعة المباركه ومن هالكلام اللي يحبب النفوس(الحمدلله على نعمة الاسلام اللي وصانا بالكلمه الطيبه)..
ايه تذكرت لا جيت تصب السنه انك تبدا من اليمين الى اليسار..
لكن العادات والتقاليد انك تبدا من الاكبر..(ياشباب اذا كنا مع بعض السنه تقدم طبعا مع انه مفروض تقدم في كل وقت)..



===

اممممم اظن هذا كل شي بالنسبه للي اعرفه عن القهوه اعدادها تقديمها..

===

شباب كلامي مجرد قياس ويحتمل الخطا ويحتاج الى التصويب منكم..

امر اخير..
القهوه ادمان..
خصوصا الانواع الاخرى "يعني غير العربيه"
واذا الله قدر راح يكون فيه موضوع خاص بافضل الاماكن التي تقدم الكوفي في الرياض بانواعها المختلفه :"اوربيه وعربيه وامريكيه حاره ومثلجه"..

===

الله يامحلى دلة القهوه في البر
الله الله شعر رائع يعجز لساني
عن مايقول
لانه لقو قال شي بيصير ظلم في حقك
طول عمرك بطلع
مواضيع قمه في الروعه
مااننحرم من جديدك يا بطل